RUS
SMARTNEWS.KZ басылымының хабарлауынша, АҚШ президенті Дональд Трамп пен Солтүстік Корея басшысы Ким Чен Ын алдағы аптада кездесу өткізуі ықтимал. Бұл туралы Оңтүстік Кореяның бірігу министрі Чон Донён мәлімдеді.
Оның айтуынша, Трамптың Сеулге сапарынан кейін осындай келіссөздердің өту ықтималдығы жоғары, себебі Пхеньян қазір АҚШ-қа ерекше назар аударып отыр.
Соңғы рет Трамп пен Ким 2019 жылдың маусымында екі Корея арасындағы демилитаризацияланған аймақта кездескен болатын — ол кездесу Трамптың твитінен кейін небәрі 30 сағатта ұйымдастырылған еді.
Бұл жолы кездесудің бастамашысы Ким Чен Ын болуы мүмкін.
Сарапшылардың пайымдауынша, Пхеньян Мәскеудің қолдауынан көңілі қалған соң, АҚШ-пен қайта байланыс орнатуға ниет білдіруде. Қазан айында Ким «Вашингтонмен жаңа келіссөздерге ашықпын» деп мәлімдеген, бірақ «ядролық қарудан ешқашан бас тартпаймын» деп те нақтылап өтті.
Сеулдегі Фридрих Науман қорының өкілі Фредерик Шпордың айтуынша, мұндай кездесу дипломатиялық серпілістен гөрі медиялық шоуға көбірек ұқсайтын болады.
«Ким Трамптың көріністік кездесулерге құмар екенін біледі. Мұндай саммиттер оған да тиімді — халықаралық беделін арттырып, Мәскеу мен Бейжіңге балама бар екенін көрсетеді. Егер кездесу өтсе, ол шоу форматында өтуі мүмкін, ал нақты нәтижелерге жету ықтималдығы аз», — дейді сарапшы.
Айта кетсек, келесі аптада Оңтүстік Кореяда Азиаттық-Тынық мұхиты экономикалық форумы аясында мемлекет және үкімет басшыларының кездесуі өтеді. Форумға АҚШ президенті Дональд Трамп пен Қытай көшбасшысы Си Цзиньпин де қатысады. Бұған дейін Трамп Ким Чен Ынмен жыл соңына дейін жүздесуге үмітті екенін айтқан болатын.