RUS
SMARTNEWS.KZ басылымының хабарлауынша, Қазақстан Республикасының Сыртқы істер министрлігі Таиланд пен Камбоджа арасындағы бейбітшілік туралы бірлескен декларацияның қабылдануына байланысты ресми мәлімдеме таратты.
Құжатқа қол қою рәсімі 25–28 қазан аралығында Куала-Лумпурда өтіп жатқан ASEAN-ның 47-саммиті аясында өтті. Іс-шараға АҚШ президенті Дональд Трамп пен Малайзия премьер-министрі Ануар Ибрагим де қатысты.
«Қазақстан Таиланд пен Камбоджа арасындағы қақтығысты бейбіт жолмен шешуге бағытталған бірлескен декларацияның қабылдануын құптайды. Бұл құжат тараптардың БҰҰ Жарғысының негізгі қағидаттарына адалдығын, сондай-ақ аймақтағы тұрақтылық пен қауіпсіздікті қамтамасыз етуге деген ұмтылысын айқын көрсетеді», — делінген СІМ мәлімдемесінде.
Министрлік сонымен қатар бұл декларацияның екі ел арасындағы достық пен тату көршілік қатынастарды нығайтуға, сондай-ақ ASEAN шеңберіндегі өңірлік ынтымақтастықты дамытуға жаңа серпін беретініне сенім білдірді.
Еске сала кетсек, бұған дейін Таиланд пен Камбоджа басшылары шекара маңындағы қарулы қақтығыстардан кейін бейбіт келісімге келген болатын. Қарсылас тараптардың атысы 24 шілдеде басталып, бес күннен кейін — 28 шілдеде атысты тоқтату туралы уағдаластыққа қол жеткізілді.
Келісімнен соң Дональд Трамп өзін «бейбітшілік президенті» деп атап, соңғы жарты жылда әлемдегі бірнеше қақтығысты тоқтатуға үлес қосқанын мәлімдеді.