RUS
SMARTNEWS.KZ басылымының хабарлауынша, Алматының «Қайрат» командасының қақпашысы Темірлан Анарбеков шешуші ойында «Астанаға» (1:1) қарсы өткен матчтан кейін әсерімен бөлісті. Бұл тең ойын «Қайратқа» қатарынан екінші чемпиондықты сыйлады.
«Ойын оңай болған жоқ. Әсіресе алғашқы таймда қиынға соқты — кейбір ойыншылардың бойында шаршаңқылық байқалды. Үзілісте бапкердің айтқанынан кейін екінші таймда гол соғып, бір команда болып ойнадық. Барлығымыздың бойымызда уайым болса да, назар мен тәртіп сақталды. Әр футболшы жеңіске өз үлесін қосты. Енді мақсатымыз — Чемпиондар лигасында жақсы нәтиже көрсету. Алла қаласа, тағы да ұпай жинаймыз», — деді Анарбеков.
Матч 26 қазанда Алматыдағы Орталық стадионда өтті және 1:1 есебімен аяқталды. Бұл нәтиже алматылықтарға маусымды 59 ұпаймен аяқтап, ел чемпионы атануға мүмкіндік берді.
Шешуші ойында Марин Томасов пен Дастан Сатпаев мергендігімен көзге түсті.
Келесі маусымда «Қайрат» УЕФА Чемпиондар лигасының 2026/27 жылғы іріктеу кезеңінде қайта бақ сынайды.