RUS
SMARTNEWS.KZ басылымының хабарлауынша, Қазақстан әлі де кейбір негізгі азық-түлік түрлері бойынша шетелге тәуелді. Бұл туралы Сауда және интеграция министрі Арман Шаққалиев «Түйін» ақпараттық-сараптамалық бағдарламасына берген сұхбатында айтты.
Министрдің сөзінше, елде 29 негізгі азық-түлік позициясының бесеуі бойынша импорттық тәуелділік сақталып отыр.
«Құс еті бойынша өзімізді небәрі 70 пайызға ғана қамтамасыз етіп отырмыз. Ет өнімдері, оның ішінде шұжық өндірісін арттыруға әлеует бар. Ал ең төменгі көрсеткіш – қант бойынша. Қазір оның тек 33 пайызы елімізде өндіріледі. Сондай-ақ ірімшік пен йогуртқа да сырттан тәуелдіміз», – деді Шаққалиев.
Оның айтуынша, алдағы екі жылда Үкімет азық-түлік қауіпсіздігінің негізгі бағыттары бойынша елді толық қамтамасыз етуді көздеп отыр.
«Біз азық-түлік қауіпсіздігін көрсететін 29 базалық тауар түрін анықтадық. Оның 19-ы – әлеуметтік маңызы бар өнімдер. Бұл позициялар бойынша тапшылық болмауы тиіс. Үкімет тәуекелдерді азайту үшін шұғыл шаралар қабылдап жатыр», – деді министр.
Қазірдің өзінде 3000-нан астам жәрмеңке ұйымдастырылған, жыл соңына дейін тағы 1700-дейі өтпек. Бұған қоса, өндірушілермен тікелей жеткізу келісімдері жасалып жатыр.
«Нарықта тауардың мол болуы – бағаны ұстап тұрудың және бәсекелестікті арттырудың басты тетігі. Сол үшін біз жұмыртқа, ұн, өсімдік майы және басқа да өнім өндірушілерімен меморандумдар жасап жатырмыз», – деді Шаққалиев.
Экономистердің айтуынша, мұндай мойындау — агроөнеркәсіп саласындағы жүйелі проблемалардың айғағы. Ал халық үшін басты мәселе – импортқа тәуелділіктің баға мен сапаға әсер етпеуін қамтамасыз ету.