RUS
SMARTNEWS.KZ басылымының хабарлауынша, Ақтөбеде мобильдік bingo37.pro қосымшасы арқылы заңсыз ойын бизнесін жүргізіп, табыстарын жылыстатқан ұйымдасқан топтың мүшелеріне сот үкімі шықты.
Тергеу материалдарына сәйкес, топ мүшелері қатысушылардан ақша аударымдарын қабылдап, әрқайсысына жеке логин мен пароль беріп, онлайн ойындарға кіруге мүмкіндік жасаған. Осылайша, заңсыз казино тәулігіне 150–200 мың теңге көлемінде табыс түсіріп отырған.
Қылмыстық кірістерді жасыру үшін алаяқтар арнайы «дропперлерді» — яғни, өздерінің банктік карталары арқылы ақшаны қолма-қол айналымға шығаратын адамдарды пайдаланған.
Белгілі болғандай, топ ұйымдастырушыларының бірі бұған дейін, 2020 жылы дәл осындай қылмыс үшін жауапқа тартылып, жазасын өтеген. Бірақ соған қарамастан, ол қайтадан заңсыз ойын бизнесін жалғастырған.
Сот үкімімен тоғыз адам кінәлі деп танылып, оларға 2 жылдан 9 жылға дейін бас бостандығынан айыру жазасы тағайындалды. Сонымен қатар, қылмыстық жолмен алынған үш автокөлік мемлекет меншігіне тәркіленді.
Қазіргі таңда үкім заңды күшіне енген жоқ.