RUS
SMARTNEWS.KZ басылымының хабарлауынша, Израиль армиясы (ЦАХАЛ) Газа секторына әуе шабуылдарын бастады. Бұл шешім Израиль премьер-министрі Биньямин Нетаньяху ХАМАС жасаған шабуылдан кейін «жедел әрі қуатты соққы беруді» бұйырған соң қабылданды.
Палестина ақпарат құралдарының хабарлауынша, соққылар Газа қаласының бірнеше ауданына бағытталған. Израиль тарапы әзірге ресми түсініктеме берген жоқ.
Израильдің қорғаныс министрі Исраэль Кац ХАМАС-тың Газадағы израильдік сарбаздарға жасаған шабуылын «оқ атпау режимін бұзу» деп атап, ұйымға қатаң жауап болатынын мәлімдеді.
«Бүгінгі ХАМАС шабуылы – келісімді ашық бұзу. ЦАХАЛ бұл әрекетке қатты күшпен жауап береді. Террористік ұйым өз әрекетінің салдарын сезеді», – деді министр.
Бұған дейін Нетаньяху Израильдің жауап шаралары ретінде Газа секторындағы армия бақылауындағы аумақты кеңейту жоспарын бекіткен. Израиль премьері бұл шешімді АҚШ-тың жоғары лауазымды тұлғаларымен келісе отырып қабылдағаны айтылады.
Газа секторында әлі күнге дейін 13 тұтқынның денесі табылмай отыр. ХАМАС сейсенбі күні бір тұтқынның мүрдесін тапқанын хабарлағанымен, Израильдің жаңа соққы жоспарынан кейін қалдықтарды қайтаруды кейінге шегеретінін мәлімдеді.
Бұл жағдай атысты тоқтату режимін толық іске асыруға кедергі келтіріп отыр. Тараптар келесі кезеңде ХАМАС-ты қарусыздандыру, Газаға халықаралық қауіпсіздік күштерін орналастыру және аумақтың болашақ басқару жүйесін анықтау мәселесін талқылауы тиіс.
Израиль бас штабының жетекшісі, генерал Эяль Замир мәлімдеме жасап, елдің үнсіз қалмайтынын айтты:
«ХАМАС өз уәдесін орындамай отыр. Біз бұл жөнінде үнсіз қалмаймыз. Барлық тұтқындардың денесін қайтару – біздің моральдық және азаматтық міндетіміз. Егер ХАМАС жауапкершіліктен қашса, қымбат төлейді. Соғыс әлі аяқталған жоқ», – деді ол.
Айта кетейік, ХАМАС Рафахтағы оқиғаға қатысы жоқ екенін айтып, Израильді атысты тоқтату келісімін бұзды деп айыптады. Ал палестиналық БАҚ дерегінше, соңғы әуе соққылары салдарынан Хан-Юнисте бес, Газа қаласында төрт адам қаза тапқан.