RUS
SMARTNEWS.KZ басылымының хабарлауынша, Өскеменнің 20-ықшамауданында жергілікті тұрғындар өз қолдарымен көпір салып шықты. Бұған дейін олар бірнеше жыл бойы әкімдікке өтініш жасап, көмек сұрағанымен, нәтиже болмаған. Ақыры жұрт ежелгі қазақ дәстүрі — асарға жүгінген. Бұл туралы Orda.kz тілшісіне жобаның бастамашысы әрі құрметті ақсақал Қыдырғазы Баймұратов айтып берген. Ол да көпір құрылысына тікелей қатысқан.
Тұрғындар жыл сайын биліктен арық үстінен өткел салып беруді өтінген. Бірақ әкімдік жобаның «тым қымбат» екенін айтып, үнемі бас тартқан. Ал адамдарға көпірсіз жүру қиын болған — айналып өтетін жол шамамен 5 шақырым, батпақты жер, уақыт пен жанармай шығыны көп.
«Мен бұл маңайда 2014 жылдан бері тұрамын. Үйімді де өзім салдым. Сосын көршілер сенім білдіріп, мені ауданның ақсақалы етіп сайлады. Әкімдікке қарап отыра бермейік деп шештік. Былтыр белсенділер жиналып, өз ақшамызға плиталар мен блоктар алдық. Техника да өзіміздікі. Сөйтіп жеңіл көліктер жүретін көпір салып шықтық. Бар шығын – шамамен 600 мың теңге», — дейді Қыдырғазы Баймұратов.
Бірақ көп ұзамай жаңа өткелмен жүк көліктер де қатынай бастаған. Сондықтан тұрғындар биыл Республика күніқарсаңында көпірді қайта күшейтуге кірісіп, тағы да асар жасап, материал сатып алған.
Қазір көпір толық нығайтылып, ауыр көліктерге де төтеп бере алады. Жалпы шығын 880 мың теңгеге жеткен — бұл әкімдік айтқан сомадан бірнеше есе аз.
«Біз нақты іспен дәлелдедік: халық біріге білсе, көп нәрсе істей алады. Бірге жұмыс істеп қана қоймай, бірге тойлаймыз да — мысалы, Жаңа жыл мен Наурызды түгел аудан боп атап өтеміз», — дейді ақсақал.
Бұл тұрғындар бұған дейін де өз күштерімен мәселелерді шешіп жүрген. Мысалы, табиғи бұлақ көзін абаттандырып, бетон науа мен құбыр орнатқан. Енді ол жерге тіпті қаланың орталығынан адамдар келіп, таза су алып кетеді.
Сондай-ақ, қала әкімдігі жол жөндеу үшін мердігер жалдағанда, тұрғындар қоғамдық бақылау орнатып, жұмыс сапасын өздері қадағалаған. Соның арқасында жол берік әрі тегіс болып шыққан.
«Біз жол салынса — бір жылда бұзылып кететінін білеміз. Сол үшін өз көзімізбен бақылайық дедік. Нәтижесінде бәрі сапалы жасалды. Өйткені істің арты жауапкершілікпен атқарылғанда ғана береке болады», — дейді Қыдырғазы Баймұратов.