RUS
SMARTNEWS.KZ басылымының хабарлауынша, Қазақстанда жасанды интеллект туралы заң қабылданды. Бұл құжат енді дипфейктерді жасау мен таратуға жауапкершілік жүктейді.
Цифрлық даму және жасанды интеллект вице-министрі Дмитрий Мунның айтуынша, жаңа заңның басты мақсаты – саланы шектеу емес, жасанды интеллект технологияларын дамытуға мүмкіндік беру.
«Бұл заңның міндеті — бәрін қатаң реттеу емес, технологияның дамуына жол ашу. Негізгі қағидаттар бекітілді, бірақ біз көріп отырған нақты тәуекелдерді, әрине, бақылауда ұстаймыз», – деді Мун.
Заң аясында енді дипфейктер үшін әкімшілік жауапкершілік енгізіледі.
«Дипфейк жасағандарға жауапкершілік қарастырылған. Заңда нақты нормалар бар: егер сіз жасанды интеллект негізіндегі өнім жасап, оны пайдаланушыларға ұсынсаңыз, олар оның ЖИ-мен өзара әрекеттесіп отырғанын анық білуі тиіс. Бұған қатысты тиісті жазалау шаралары мен әкімшілік нормалар бекітілді», – деп түсіндірді вице-министр Мәжілісте сөйлеген сөзінде.
Жаңа заңның қабылдануы — жасанды интеллект саласын реттеудің алғашқы қадамы. Билік өкілдерінің айтуынша, енді бұл бағыттағы саясат технологиялық қауіптер мен этикалық мәселелерге нақты жауап бере алады.