RUS
SMARTNEWS.KZ басылымының хабарлауынша, «МұнайСпецСнаб Компани» серіктестігінің қызметкерлері еңбек жағдайына наразылық білдіріп, жұмысын уақытша тоқтатқан болатын. Қазір жағдай тұрақталып, өндіріс қайта жанданған.
Ереуілшілердің басты талабы — жалақыны көтеру, еңбек құқығын қорғау және әлеуметтік әділдік орнату болған.
«Біз өз құқықтарымыздың ескерілмей келе жатқанын ашық айттық. 28 қазаннан бастап жұмысты уақытша тоқтатуға мәжбүр болдық. Еңбек әділдігі мен қызметкерлердің құқығын қорғауды талап етеміз», — делінген ұжым атынан таратылған үндеуде.
Әлеуметтік желіде тараған видеоларда кәсіпорын ғимаратының алдында ондаған адамның жиналып, өз әріптестерін қолдап тұрған сәттері көрсетілген.
Кейін Энергетика министрлігі жағдайды бақылауға алып, мәселе бойынша ресми түсініктеме дайындап жатқанын хабарлады.
Бүгінгі жағдай бойынша ведомство өкілдері мен компания басшылығының араласуымен мәселе шешімін тапты.
«2025 жылғы 29 қазанға қарай «Мұнайспецснабкомпани» ЖШС-дегі ахуал толық реттелді. Кәсіпорынның жұмысы қалпына келтірілді, еңбек ұжымы өз жұмыс орындарына оралды. Басшылық пен қызметкерлер арасында келіссөз жүргізіліп, өзара келісімге қол жеткізілді», — деп хабарлады компания өкілдері.
Айта кетейік, «Мұнайспецснабкомпани» ЖШС — «ӨзенМұнайСервис» компаниясына көлік қызметтерін көрсететін мердігер ұйым.