RUS
SMARTNEWS.KZ басылымының хабарлауынша, музейде екі елдің президенттеріне Қазақстанның ежелгі тарихы мен мәдениетінен сыр шертетін бірегей жәдігерлер таныстырылды.
Қонақтар көне түркі өркениетіне арналған экспозицияларды, Ұлы даланың ежелгі өнері мен технологияларын, сондай-ақ қазақтың дәстүрлі мәдениетін бейнелейтін залдарды аралады.
Мемлекет басшыларына халқымыздың көпғасырлық тарихын көрсететін құнды артефактілер мен өнер туындылары ұсынылды.
Еске сала кетейік, Александр Стуббтың Қазақстанға ресми сапары аясында екі ел арасында 15 маңызды құжатқа қол қойылды.
Олардың қатарында:
– Қазақстанның Атом энергиясы жөніндегі агенттігі мен Финляндияның Радиациялық және ядролық қауіпсіздік басқармасы (STUK) арасындағы ядролық энергияны бейбіт мақсатта пайдалану жөніндегі меморандум;
– Су ресурстарын басқару саласындағы ынтымақтастық туралы Қазақстанның Су ресурстары және ирригация министрлігі мен Финляндияның Ауыл және орман шаруашылығы министрлігі арасындағы келісім;
– Су ресурстарын цифрландыру және басқару бағытында ғылыми және білім беру әлеуетін арттыру туралы Қазақстанның Ғылым және жоғары білім министрлігі, Finnish Water Forum және Қазақ ұлттық су шаруашылығы және ирригация университеті арасындағы меморандум;
– «Бурабай» курортында туризмді дамыту жөніндегі өзара түсіністік туралы келісім;
– Қазақстанда экологиялық ауыл жобасын дамыту жөніндегі меморандум;
– Сонымен қатар, «Теңіз жасағы» АҚ мен финдік Lamor Corporation Plc компаниясы арасында мұнайдың төгілуін жою және теңіз операцияларын қолдау саласындағы әріптестік жөнінде келісім бар.
Бұл құжаттар Қазақстан мен Финляндия арасындағы ынтымақтастықты жаңа деңгейге көтеріп, экология, энергетика, білім және туризм салаларындағы серіктестікті нығайтуды көздейді.