RUS
SMARTNEWS.KZ басылымының хабарлауынша, Қытайдың әйгілі Hunan TV телеарнасы Қазақстанның ең әсем туристік локацияларында түсірілген «Voice Beyond Horizon» атты жаңа халықаралық тележобаның промо-бейнесін көпшілікке ұсынды. Бағдарлама Қазақстанның табиғи және мәдени мұрасын миллиондаған көрерменге таныстыруды мақсат етеді.
Жоба Димаш Құдайбергеннің бастамасымен, Hunan Broadcasting System телеарнасымен бірлесе жүзеге асырылған. Түсірілім тобы биылғы қыркүйек айында Қазақстанды аралап, 7436 шақырымнан астам жол жүріп, 22 күн бойы еліміздің көрікті өңірлерін түсірген.
Бейнежобаның кадрларына Түркістандағы көне тарихи нысандар, Маңғыстаудағы Бозжыра шатқалы мен Каспий теңізі жағалауы, Қайыңды көлі, Саты ауылы, Қапшағай су қоймасы, сондай-ақ Көбейтұз көлі мен Бурабайдың табиғи көріністері енген.
Түсірілімге Қазақстан, Қытай, Қырғызстан, Италия, Малайзия және Сербия елдерінің танымал орындаушылары мен өнерпаздары қатысты.
«Voice Beyond Horizon» жобасы 2026 жылы Hunan TV арнасында ресми түрде көрсетіледі.
Жобаның жүзеге асуына Kazakh Tourism ұлттық компаниясы, Туризм және спорт министрлігі, «Жолаушылар тасымалы» АҚ, сондай-ақ өңір әкімдіктері қолдау білдірді.