RUS
SMARTNEWS.KZ басылымының хабарлауынша, Премьер-министр Олжас Бектенов ел өңірлеріндегі инвестиция тарту қарқынына тоқталып, жоспарды орындай алмай отырған облыстарды сынға алды.
Оның айтуынша, 2025 жылы Қазақстан экономикасына 150 млрд доллар көлемінде шетелдік инвестиция тарту көзделген, алайда жыл соңына дейін бұл жоспардың тек жартысы ғана орындалған.
Негізгі капиталға салынған инвестиция көлемі 13,8 трлн теңгені құрап, 13,5 пайыздық өсім көрсеткен. Ең жоғары өсім энергетика, өңдеу өнеркәсібі және ауыл шаруашылығы салаларында тіркелген.
Инвестиция тартуда көш бастаған өңірлер – Астана қаласы мен Түркістан облысы.
Ал көрсеткіші төмен аймақтар қатарында Қарағанды, Атырау, Ұлытау және Абай облыстары бар.
Мәселен, Атырау облысында жоспардың тек 42,8 пайызы, ал Абай облысында небәрі 26,2 пайызы ғана орындалған.
Үкімет басшысы бұл бағытта жұмысты жандандырып, инвесторлармен нақты әрі нәтижелі келіссөздер жүргізу қажеттігін атап өтті.