RUS
SMARTNEWS.KZ басылымының хабарлауынша, Қазақстан жасанды интеллектіні нақты өмірге енгізе бастады. Енді ChatGPT негізіндегі білім беру жобасы іске қосылады. Бұл туралы Президент Қасым-Жомарт Тоқаев мәлімдеді.
Мемлекет басшысы атап өткендей, білім мен ғылымға салынған инвестиция – елдің жарқын болашағына салынған ұзақ мерзімді қадам. Оның айтуынша, алдағы жылдары Қазақстан экономиканы жаңғыртып, жаңа өндіріс секторларын дамытуды, ал ең бастысы – жасанды интеллектіні барлық салаға енгізуді мақсат етіп отыр.
«Қазақстан технологиясы озық ел болуға нық қадам басты. Бұл – біздің жаңа ұлттық болмысымыздың маңызды бөлігі. 2030 жылға қарай жасанды интеллект әлемдік ІЖӨ көлемін 15 триллион доллардан аса арттырады деп болжанып отыр. Бірақ ең көп пайданы қай ел алады? Біз осы сұраққа нақты жауап іздеуіміз керек», – деді Президент.
Тоқаевтың айтуынша, Қазақстанда ЖИ мамандарын даярлау және бұл технологияны түрлі саламен интеграциялау – стратегиялық басымдық. Осы мақсатта жыл басында іске қосылған AI Sana бағдарламасы бойынша 540 мыңнан астам студент оқудан өткен. Енді жасанды интеллект курстары барлық мектеп пен университет бағдарламасына міндетті түрде енгізілмек.
Сонымен қатар елде Жасанды интеллект университетін ашу үшін дайындық жүріп жатыр.
Президент қыркүйекте АҚШ-қа жасаған сапары кезінде OpenAI компаниясымен өзара серіктестік орнатылғанын еске салды.
«Нәтижесінде Қазақстан ChatGPT негізінде білім беру құралдарын енгізу жөніндегі пилоттық жобаны жүзеге асыра бастады. Бұл – отандық білім жүйесінің цифрлық трансформациясының басы», – деді Қасым-Жомарт Тоқаев.