RUS
SMARTNEWS.KZ басылымының хабарлауынша, Қырғызстанда мектеп оқушылары жаппай уланды. Бішкектегі білім ордаларының бірінде 54 бала мен тағы төрт ересек адам шаурмадан уланып, ауруханаға түсті. Мұндай ақпаратты 24.kg таратты.
Қырғызстан Денсаулық сақтау министрлігінің мәліметінше, оқиға 31 қазан кешке тіркелген. Балалар құсу, іш өту және қатты ауырсыну белгілерімен жұқпалы аурулар клиникасына жеткізілген. Тергеу барысында бәрі мектеп асханасынан шаурма жегені анықталды.
Ауруханаға түскен 58 адамның тоғызын — жеті бала мен екі ересекті — дәрігерлер жатқызды. Қалғандарына алғашқы көмек көрсетіліп, үйіне жіберілді. Барлығына асқазанды жуу және қажетті талдаулар жасалған.
Қазір эпидемиологиялық тексеріс жүріп жатыр. Асхананың жұмысы мен санитарлық талаптарды сақтау деңгейі қаралуда.
Бұл — соңғы апталарда тіркелген жалғыз жағдай емес. Жақында Қостанай облысында 85 адам тойдан кейін уланып, дәрігерге жүгінген еді. Ал Түркістанда фастфудтан жаппай улану тіркелді: күдікке іліккен кафе бұған дейін де дәл сондай себеппен жабылған.