RUS
SMARTNEWS.KZ басылымының хабарлауынша, Қазақстанда 2025 жылы жұмысшылар жиі алатын жалақы мөлшері белгілі болды. Ұлттық статистика бюросының дерегінше, биыл модальді жалақы 116 059 теңгені құрайды. Бұл – елдегі орташа айлықтан төрт есеге жуық төмен көрсеткіш.
Жалақы деңгейін бағалауда бірнеше экономикалық өлшем қолданылады. Мәселен, биылғы екінші тоқсанда орташа номиналды жалақы 448 620 теңге деп есептелген. Ал медиандық жалақы – 317 512 теңге. Бұл елдегі табыстың шынайы бөлінісін көрсететін нақтырақ көрсеткіш саналады: жартысы осы сомадан көп, жартысы азырақ табады.
Алайда статистика қызметі ең жиі қайталанатын жалақыны да есептейді. Сол модальді көрсеткіш – 116 мың теңге. Бұл қазақстандықтардың едәуір бөлігі дәл осы шамада айлық алады деген сөз.
Дегенмен аталған сома жыл ішінде шамамен 19 пайызға артқан: 2024 жылы модальді жалақы 97 557 теңге болған. Бірақ сарапшылар бұл өсім инфляцияны толық жаба алмайтынын айтады.
Аймақтар арасында айырмашылық айтарлықтай. Ең жоғары модальді жалақы Шығыс Қазақстан облысында тіркелген – 256 907 теңге. Одан кейін Астана (252 738 тг) мен Алматы (247 385 тг) келеді. Сондай-ақ Атырау облысы (242 995 тг) мен Шымкент (208 179 тг) алғашқы бестікте.
Ең төмен көрсеткіш Солтүстік Қазақстан (112 745 тг), Түркістан (113 110 тг) және Батыс Қазақстан (113 201 тг) облыстарында байқалған.
Статистикалық мәліметтерге сүйенсек, модальді жалақы әлі де орташа және медиандық табыстан бірнеше есе төмен. Бұл Қазақстан азаматтарының елеулі бөлігі мардымсыз жалақыға жұмыс істейтінін және табыс теңсіздігінің жоғары екенін көрсетеді.