Тұмау маусымы басталды: Сәбилер мен жүкті әйелдер ауруханаға көп түсіп жатыр
Дәрігерлер қатаң ескерту жасады.
SMARTNEWS.KZ басылымының хабарлауынша, Астана қаласында эпидемиологиялық маусым басталғалы бері жедел респираторлық вирустық инфекция жұқтыру деректері 27 469 адамға жетті. Мұны қалалық санитариялық-эпидемиологиялық бақылау департаменті мәлімдеді.
100 мың тұрғынға шаққанда аурушаңдық деңгейі 1 796,8 болып отыр. Бұл – өткен жылдың сәйкес кезеңінен 5 пайызға төмен көрсеткіш.
Науқастардың 61 пайызы – 14 жасқа дейінгі балалар (16 624 жағдай). Оның ішінде 920-сы – бір жасқа толмаған сәбилер.
Маусым басталғаннан бері «тұмау/жедел респираторлық инфекция» диагнозымен 982 адам ауруханаға жатқызылған. Олардың қатарында 76 жүкті әйел (8%) және 356 бөбек (36%) бар.
Вакцинация науқаны 23 қыркүйекте басталып, 145 мың доза тұмауға қарсы препарат сатып алынған.
30 қазанға дейін:
• 134 977 адам екпе алған (қаланың 8,83%)
• Соның 134 077-і – жергілікті бюджет есебінен
• Тәуекел тобындағы 144 500 адамның 72 705-і вакцина алды (98% қамту)
• Жұмыс берушілер қаржысы есебінен 9 000 ересек егілді
Дәрігерлер сақтану ережелерін қатаң ұстануға шақырады:
– ауру белгілері байқалса, емханаға дереу бару;
– адам көп шоғырланатын орындарға бармау;
– белгілер пайда болғанда бетперде тағу;
– ауырған баланы балабақшаға немесе мектепке жібермеу;
– жеке гигиена мен желдету тәртібін сақтау.
Департамент эпидемиологиялық ахуалды үнемі бақылауда ұстап, тұрғындарды өз денсаулығына жауапты болуға үндеді.
Материал авторы
