RUS
SMARTNEWS.KZ басылымының хабарлауынша, Қазақстанда әлеуметтік желілер арқылы рұқсатсыз лотерея өткізетіндерге қарсы бақылау күшейтілді. Туризм және спорт министрлігінің Ойын бизнесін және лотереяны реттеу комитеті онлайн-платформалар мен әлеуметтік желілерді тұрақты түрде тексеріп келеді.
Комитет мәліметінше, жеке тұлғалардан түскен шағымдар мен мониторинг нәтижесінде биыл 89 адам әкімшілік жауапкершілікке тартылды. Олар ҚР Әкімшілік құқық бұзушылық туралы кодекстің 445-1-бабы 6-бөлігін бұзғаны үшін жазаланған.
Рұқсатсыз ұтыс ұйымдастырғандарға ескерту жасалып, онлайн және офлайн форматта түсіндіру жұмыстары жүргізілген. Сондай-ақ заңсыз конкурс өткізген аккаунттардың толық тізімі министрліктің ресми сайтында жарияланды.
Құқық бұзушылар хаттамамен келіссе – айыппұлды өздері төлейді, келіспесе – іс сотқа жолданады.
Заңға сәйкес, лотерея операторы емес адам ұтыс ойын өткізсе:
жеке тұлғаға – 100 АЕК,
жеке кәсіпкерге – 300 АЕК айыппұл салынады.
Бір жыл ішінде құқық бұзушылық қайталанса:
жеке тұлғаға – 200 АЕК,
шағын кәсіпкерлік субъектілеріне – 750 АЕК айыппұл белгіленеді.
Түскен табыс толық тәркіленеді.
Комитет дерегінше, жыл басынан бері салынған айыппұлдар көлемі небәрі 40 млн теңгеге жуықтаған.
Танымалдардың «ұтыс дауы»: атақ та құтқармады
Заңсыз ойынға селқос қарағандар арасында шоу-бизнес өкілдері де бар.
Жеке өміріндегі жанжалымен жиі айтылатын әзілкеш Жақсыген Нұрсұлтан — бұрынғы жұбайына алимент төлемеу оқиғасынан кейін тағы да ел назарына ілікті. Бұл жолы — 369 200 теңге айыппұл.
Әнші Абай Бегейдің қызы Ерке Ниязқұлова да әлеуметтік желідегі белсенділігін ақылы ұтыстарға айналдырғандардың қатарында. Ол екі мәрте ұсталып, айыппұл көлемі жалпы есеппен 2 215 200 теңгеге жеткен.
Блогерлікпен байлыққа кенелгендердің бірі — қымбат үйлерімен мақтануға дағдыланған Дархан Жолшыбеков. Отбасылық дауынан бастап миллиард тұратын баспанасын ұтысқа қойып дабыралаған ол да жауаптан қашпады — 393 200 теңге айыппұл.
«Жайдарман» сахнасынан танылғандар да бұл жолы әзілдей алмады. «Миллион» командасы ойыншысы Ерболат — 196 600 теңге, «Тек қана қыздар» қатысушысы Мереке Қалбаева — 589 800 теңге айыппұл арқалады.
Байлығымен желіні шулатқан кей блогерлер де жазасыз қалмады.
justking31 деген атпен танылған контент жасаушы — 1 179 600 теңге,
super.mamasita — 825 720 теңге төледі.
Ел аузында жиі жүретін әнші, продюсер Мөлдір Мұқанова да рұқсатсыз ойын ұйымдастырғаны үшін 589 800 теңгеге жазаланды.