RUS
Жайық-Каспий облысаралық балық шаруашылығы бассейндік инспекциясының арнайы өкілі Олег Тушкановтың айтуынша, 1 сәуірден бері «Бекіре-2023» акциясы өтіп жатыр.
Бұл акция 31 мамырға дейін жалғасады.
«Инспекция қызметкерлері 1-6 сәуір аралығында 71 құқық бұзушылық деректі анықтады. Бес күнде заңсыз балық аулаған 38 адам әкімшілік жауапкершілікке тартылды. Сот шешімімен 4 адамға 1 млн 43 мың теңге айыппұл салынды. Екі дерекке қатысты ҚР Қылмыстық кодексінің 335 және 339-бабына сәйкес қылмыстық іс қозғалды. Құқық бұзушылардан 645,2 келі балық, оның ішінде 49 келі бекіре тұқымдас балық түрі, 37 ау құралы, 8 жүзу құралы тәркіленді», -деп хабарлады Олег Тушаканов.
Оның дерегіне сүйенсек, 2 сәуірде Маңғыстау облысындағы Форт-Шевченко қаласында гараждың бірінен жалпы салмағы 49 келі бекіре тұқымдас балық табылған.
Ал, 5 сәуірде Атырау облысының Жанбай ауылының екі тұрғыны «Будара» жүзу құралы ұсталды. Қайықтан 227 келі балық алынған.
Аталған аталған істер бойынша сотқа дейінгі тергеу жүріп жатыр.