RUS
SMARTNEWS.KZ басылымының хабарлауынша, қазақстан тұрғыны Еркебұлан Жексенбеков бензин арамен ұйымдастырылған қауіпті пранктан кейін әлі есін жия алмай жүр. Айтуынша, сол оқиғадан соң тұтыға бастады, ал лифтіден өлердей қорқатын болғандықтан, күн сайын көпқабатты үйдің баспалдағымен жаяу көтеріледі.
Ер адамның сөзіне қарағанда, оқиға қонақтан қайтып келе жатқан түнде болған. Лифт есігі жабыла бергенде, қолында қосулы бензин арасы бар адам баса-көктеп кірген. Құралдың майы шашылып, оның киімін былғап үлгерген. Есеңгіреп қалған жігіт екі күн бойы өз-өзіне келе алмағанын айтады.
Полиция дерегінше, осы пранктің авторы мұндай заңсыз әрекеті үшін бұған дейін екі мәрте әкімшілік жазаға тартылған. Соған қарамастан, әлеуметтік желілерде адам өміріне қауіп төндіретін видеолар әлі де таралуда.
Психологтар мұндай әрекеттердің психикаға тікелей соққы екенін айтады. Мамандардың бірі, Алтыншаш Матаева, өз тәжірибесінде осындай құрбандармен жұмыс істегенін жеткізді. Оның айтуынша, үрей, ұйқысыздық, қорқыныш ұзаққа созылуы мүмкін, сондықтан кәсіби көмек қажет.
Ішкі істер министрлігі қауіпті пранктердің көбеюін жасырмайды. Ал Мәжілісте қоғамға қауіп келтіретін «әзілкештерге» жауапкершілікті күшейту ұсыныстары талқыланып жатыр.