RUS
SMARTNEWS.KZ басылымының хабарлауынша, Сингапурда ұсталған үш Қытай азаматының ноутбуктерінен бірнеше елдің мемлекеттік органдарына қатысты құжаттар мен хат-хабар табылды. Сол елдердің қатарында Қазақстан да бар. Бұл туралы жергілікті басылымдар хабарлады.
33 жастағы Лю Юци есімді күдіктінің құрылғысынан Қазақстан Сыртқы істер министрлігі мен Индустрия және инфрақұрылымдық даму министрлігінің қызметкерлері арасындағы құпия хат табылған. Оның мазмұны әзірге жария етілмеді.
Тергеу мәліметі бойынша, Лю Юци, Янь Пэйцзянь және Хуань Циньчжэн халықаралық қылмыстық топқа жұмыс істеген. Олар мемлекеттік жүйелерге еніп, құпия ақпарат жинауды мақсат еткен. Құрықталған кезде олардың құрылғыларынан жүздеген зиянды бағдарлама, соның ішінде бөтен компьютерлерді толық басқаруға мүмкіндік беретін RAT құралдары анықталды. Сондай-ақ PlugX атты зиянкес бағдарлама да табылған — мұндай бағдарламаны әдетте мемлекеттік құрылымдарға байланысы бар хакерлік топтар қолданады.
Яньның ноутбугінде Австралия, Аргентина және Вьетнам мемлекеттік сайттарының әлсіз тұстары талқыланған хаттар сақталған. Ал Хуаньда филиппиндік энергетикалық компания клиенттерінің жеке деректері табылды.
Сингапур соты 5 қараша күні хакерлерді екі жыл бес айға бас бостандығынан айырды.
Қазақстандық мемлекеттік органдар бұл жағдайға қатысты әзірге ресми түсінік берген жоқ.