RUS
SMARTNEWS.KZ басылымының хабарлауынша, Сенат зияткерлік меншік саласын толық жаңартатын заңды қабылдады. Құжат авторлық құқық, патент және тауар белгісі жөніндегі рәсімдерді жеңілдетуді көздейді. Алайда бұл өзгерістер өнерпаздардың табысына кері әсер етуі мүмкін деген алаң бар.
Заңға енгізілген түзетулер телерадио компаниялардың айрықша құқықтарын нақтылайды, көру қабілеті бұзылған азаматтарға шығармаларға кеңірек қолжетімділікті қамтамасыз етеді. Сонымен бірге тауар белгісін тіркеу мерзімі айтарлықтай қысқарады: бастапқы сараптама – он жұмыс күні, толық сараптама – үш айда аяқталуы тиіс.
Кез келген өтінім ерте кезеңде-ақ кері қайтарылуы мүмкін. Патенттік өкілдерге де жаңа талаптар енгізілді.
Даулы тұстың бастысы – авторлық құқықтарды басқарудың бірыңғай цифрлық платформасы. Оны Әділет министрлігіне қарасты Зияткерлік меншік ұлттық институты әзірлеп жатыр. Платформа арқылы туындының кім, қайда, қалай пайдаланғаны бақыланып, сыйақы төлемі соған сәйкес жүргізілмек.
Ресми түсіндірмеде бұл жүйе ашықтықты арттырып, құқық иелеріне төленетін қаржының әділ бөлінуіне ықпал етеді деп көрсетілген.
Бірақ бес халықаралық ұйым Қазақстанның бағытына қарсы шықты. Олар жаңа модель елді әлемдік құқық қорғау жүйесінен алшақтатуы мүмкін деп ескертеді. Өнер иелерінің шетелден қаламақы алу мүмкіндігі шектелуі ықтимал. Сондықтан сарапшылар заңды қабылдауды тоқтатып, механизмдерді қайта қарауға шақырған.