RUS
SMARTNEWS.KZ басылымының хабарлауынша, Стамбул соты Израиль премьер-министрі Биньямин Нетаньяхуға және 36 жоғары лауазымды израильдік шенеунікке Газа секторындағы геноцид пен адамзатқа қарсы қылмыстар үшін ордер берді. Бұл туралы Түркияның Бас прокуратурасы хабарлады.
Айып тағылғандардың қатарында Израильдің қорғаныс министрі Исраэль Кац, ұлттық қауіпсіздік министрі Итамар Бен-Гвир және Қарулы күштер бас штабының бастығы Эяль Замир бар.
Прокуратураның мәлімдеуінше, Израильдің Газа секторында жүйелі түрде жүргізіп отырған әскери әрекеттері мыңдаған бейбіт тұрғынның, соның ішінде әйелдер мен балалардың қаза табуына себеп болған. Мыңдаған адам жараланып, тұрғын үйлер мен инфрақұрылым толықтай қираған.
Айыптау материалында Түркия «Бостандық флотилиясы» ісін де атап өткен. Биыл қазан айында Израиль билігі Газаға гуманитарлық жүк жеткізбек болған кемелерді тағы да тоқтатқан еді. Сол кемелердің бірінде швед экобелсендісі Грета Тунберг те болған.
Израиль басшылары Түркия аумағында болмағандықтан, Стамбул қылмыстық соты олардың қамауға алынуы жөнінде сырттай шешім шығарды. Бұған дейін 2024 жылы Халықаралық қылмыстық сот та Нетаньяхуға соғыс қылмыстары үшін ордер берген болатын.