RUS
SMARTNEWS.KZ басылымының хабарлауынша, Голливуд актрисасы Анджелина Джоли әлеуметтік желіде Украинаға жасаған сапары туралы жазба жариялады. Ол соғысқа жақын аймақтарда болып, дрондардың қаупі астында өмір сүріп жатқан жергілікті тұрғындармен кездескенін мәлімдеді.
Актриса Николаев пен Херсон қалаларында болып, соғыс жағдайында күн кешіп жатқан отбасылардың тұрмысымен танысқан.
«Біз тоқтап, дрон ұшып өткенше күтуге мәжбүр болдық. Менің үстімде қорғаныс киімі болды, ал олар осындай жағдайда күн сайын өмір сүреді», – деді Джоли.
Оның айтуынша, соғыс аймақтарында мектептер, ауруханалар мен балабақшалар жер астында жұмыс істейді.
«Тіршілік соғысқа қарамастан жалғасуы керек», – дейді актриса.
Джоли украиндардың басты қорқынышы тек жарылыстар емес, әлемнің оларды ұмытып кетуі екенін атап өтті. Ол сонымен қатар Судан, Газа, Йемен және Конго тұрғындарының ауыр жағдайына да назар аударды.
«Егер еріктілердің өзі күресті жалғастыруға қауқар тапса, үкіметтер де әрекет етуге тиіс», – деп жазды Джоли.
Бұған дейін БАҚ актрисаның Херсонда аурухана мен перзентхананы аралап, аналармен кездескенін хабарлаған. Ал Николаевта оның көлігін блокпостта тоқтатып, күзетшісін әскерге алу әрекеті болғаны айтылды. Джоли жағдайға араласып, күзетшіні босатып алған.
Еске салсақ, 2022 жылы Анджелина Джоли Львов қаласында болған сапары кезінде әуе дабылы жарияланып, актриса еріктілермен бірге жерасты панасына жасырынған еді. Сол кезде ол журналистердің «қорықпадыңыз ба?» деген сұрағына «бәрі жақсы» деп жауап берген болатын.