RUS
SMARTNEWS.KZ басылымының хабарлауынша, 11 қараша күні Мәжілісте «Радиоактивті қалдықтармен жұмыс істеу туралы» заң жобасы таныстырылды. Құжаттың негізгі ережелерін депутат Еділ Жаңбыршин түсіндірді.
Оның айтуынша, бүгінде Қазақстанда иондаушы сәулелену көздері энергетика, медицина, ғылым және тау-кен, мұнай-газ салаларында кеңінен қолданылады. Соның нәтижесінде түрлі радиоактивті қалдықтар түзіледі. Алайда қазіргі заңнама бұл саланы толық қамтымайды, ал қолданыстағы нормалар шашыраңқы сипатта.
Жаңа заң жобасының басты мақсаты – радиоактивті қалдықтарды басқарудың бірыңғай құқықтық жүйесін қалыптастыру, халық пен қоршаған ортаны радиациялық әсерден қорғау және қалдықтарды қауіпсіз сақтау мен көму тәртібін белгілеу.
Құжатта радиоактивті қалдықтармен жұмыс істеудің жалпы талаптары айқындалған. Сондай-ақ радиоактивті қалдықтармен айналысатын Ұлттық оператор институтын енгізу және оның қаржыландыру көздері мен техникалық инфрақұрылымын анықтау көзделіп отыр.
Еділ Жаңбыршиннің айтуынша, халықаралық тәжірибе мұндай оператордың болуы қалдықтар айналымының қауіпсіз әрі ашық болуын қамтамасыз етіп, функциялардың бытыраңқылығын болдырмайды және қауіпсіздік стандарттарын біріздендіреді.
Заң жобасында радиоактивті қалдықтарды жинау, өңдеу, көму және осындай нысандарды жобалау мен пайдалануға беру тәртібі егжей-тегжейлі реттелген.
«Маңызды нормалардың бірі – өзге елдерден радиоактивті қалдықтарды әкелуге және оларды Қазақстан аумағында көмуге тыйым салу. Бұл еліміздің экологиялық егемендігі мен ұлттық қауіпсіздігін қорғауға бағытталған», – деді депутат.