RUS
SMARTNEWS.KZ басылымының хабарлауынша, әлемге танылған қазақ әншісі Димаш Құдайберген Лондонда CNN телеарнасына сұхбат берді. Әртіс 12 қараша күні осы қалада өтетін жеке концертіне дайындалып жатыр.
Сұхбаттың үзіндісі әлеуметтік желілерде жарияланды. Бағдарлама жүргізушісі Димаштың 16 түрлі тілде ән орындайтынын және оның ерекше вокалдық диапазоны әлемді таңғалдырғанын атап өтті.
«Димаш 16 тілде ән салады және бүгінде бүкіл әлемге танымал. Ол жақында Нью-Йорктегі “Мэдисон-сквер-гарденде” өнер көрсетті. Ал енді Лондонда концерт өткізбек. Сіз Орталық Азия мен Қытайда аса танымалсыз, енді сізді әлем де жақынырақ тани бастады. Вокалдық шеберлігіңіз көпшілікті таң қалдырады», — деді жүргізуші.
Өз кезегінде Димаш Құдайберген CNN студиясына шақырғаны үшін алғысын білдіріп, әлемдік аудиторияға Қазақстаннан сәлем жолдады.
«Маған көрсеткен құрметтеріңізге рахмет. Бұл мен үшін үлкен мәртебе. Осы мүмкіндікті пайдаланып, Қазақстан атынан шын жүректен сәлем айтамын», — деді ол.
Димаштың айтуынша, халықаралық мансабы шамамен 15 жыл бұрын басталған. Ол алғашында опера орындаушылығын меңгеріп, кейін Астанадағы Өнер университетінде эстрада мен джаз бағыты бойынша білім алған. Сондай-ақ композицияны екі жыл бойы оқығанын айтты.
«Бүгін Лондонға келген бетте CNN арнасының “What We Know with Max Foster” бағдарламасына қатыстым. Шақырғандарыңыз үшін алғыс айтамын. 12 қарашада өтетін OVO Wembley Arena-дағы концертімде көріскенше!» — деп жазды әнші өзінің парақшасында.
Желі қолданушылары Димаштың сұхбатына жоғары баға беріп, оның ұстазы Марат Айтимовке алғыс айтып, алдағы концертіне сәттілік тіледі.