RUS
SMARTNEWS.KZ басылымының хабарлауынша, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Сауд Арабиясына жасаған ресми сапары барысында Жидда қаласында Қажылық және ұмра істері жөніндегі министр Тауфиқ ибн Фаузан ар-Рабиамен кездесті.
Келіссөз кезінде Сауд Арабиясы Корольдігі Қазақстанға 2026 жылғы қажылық маусымына 4000 орын бөлінгенін ресми түрде хабарлады.
Тараптар алдағы маусымды жоғары деңгейде ұйымдастыру, қажылардың қауіпсіздігін қамтамасыз ету және қызмет сапасын арттыру мәселелерін талқылады. Сондай-ақ, орналастыру мен көлік жүйесін жетілдіру, ақпараттық және медициналық қызмет көрсетуді тиімді үйлестіру тетіктері қаралды.
Бас мүфти қажылықты заңсыз, яғни визасыз ұйымдастыруға тырысатын фирмалардың әрекетіне тосқауыл қою қажеттігін атап өтті. Бұл бағытта екі тарап ақпарат алмасу мен бақылауды күшейтуге уағдаласты.
«Сауд Арабиясы жыл сайын қажылық қызметін жақсарту үшін жаңа технологияларды енгізіп келеді. Бұл қажыларға сапалы қызмет көрсетуді қамтамасыз етеді. Алдағы маусым да жоғары деңгейде өтеді деген сенім бар», – деді Наурызбай қажы Тағанұлы.
Өз кезегінде министр Тауфиқ ибн Фаузан ар-Рабиа Қазақстанмен серіктестікті жоғары бағалап, қажылық саласындағы ынтымақтастықтың одан әрі нығаятынын айтты.
Кездесу соңында тараптар 2026 жылғы қажылық маусымын ұйымдастыру жөніндегі екіжақты келісімге қол қойды. Қол қою рәсіміне Қазақстан Республикасының Жидда қаласындағы Бас консулы Руслан Қоспанов және ҚМДБ делегациясының мүшелері қатысты.