RUS
SMARTNEWS.KZ басылымының хабарлауынша, Мәжіліс бүгін жаңа Цифрлық кодекс пен оған қосымша екі заң жобасын бірінші оқылымда мақұлдады. Депутат Екатерина Смышляева құжаттарды таныстырды.
Жаңа кодекс цифрлық деректер мен платформаларды құқықтық объект ретінде танып, олардың экономикалық құндылығын арттырады және азаматтық айналымда қолдануға мүмкіндік береді. Сонымен қатар, eGov сияқты мемлекеттік жүйелер «ұлттық объект» мәртебесіне ие болып, жеке меншікке сатылудан немесе шетелге берілуінен қорғалады.
Электронды цифрлық қолтаңба негізгі қол қою тәсілі ретінде сақталатын болады, бірақ кей жағдайларда онлайн қызметтерге келісім беру кезінде SMS, push-хабарлама немесе биометриялық растау сияқты жеңілдетілген әдістерді қолдануға рұқсат етіледі.
Кодексте электронды құжаттар үш категорияға бөлінеді:
1. Электронды құжаттар – ЭЦҚ қойылған, қағаз құжатпен тең.
2. Цифрлық құжаттар – мемлекеттік базалардан алынатын анықтамалар.
3. Цифрлық мәліметтер – дерекқорлардан алынған жазбалар, мысалы ЖСН арқылы.
Сонымен қатар, алғаш рет «цифрлық дәлел» және «цифрлық делдал» ұғымдары енгізілмек. Енді электронды жазбалар сотта дәлел ретінде қолданылуы мүмкін, ал маркетплейстер мен курьерлік сервистердің жауапкершілігі заңмен бекітіледі.