Ресей дронмен күрес деген сылтаумен интернетті жаппай өшіре бастады
Тіпті Ульянов облысы интернетті соғыс аяқталғанша бұғаттады.
SMARTNEWS.KZ басылымының хабарлауынша, Ресейдің бірқатар аймақтарында мобильдік интернетке шектеу қою жүйелі сипатқа айналды. Ульянов облысы 11 қарашада мобильдік интернетті Украинадағы соғыс аяқталғанша толық бұғаттайтынын мәлімдеді. Аймақ басшылығы мұны «украиналық дрондарға қарсы шара» деп түсіндіреді.
Ресми ақпаратқа сәйкес, шектеулер арнайы нысандардың маңында енгізілгенімен, бұғаттау аймағына тұрғын үйлер, әлеуметтік нысандар және кеңсе ғимараттары да кіріп кеткен. Аймақтың цифрлық даму министрі Олег Ягфаров шешім федералдық деңгейде қабылданғанын және мерзімінің белгісіз екенін айтты.
2025 жылғы көктемнен бастап Ресейдің түрлі қалаларында интернетті уақытша өшіру жиілеген еді. Маусымдағы Украина жүргізген «Өрмек» операциясынан кейін – стратегиялық авиация нысандарына жасалған дрон шабуылдары кезінде – Еуропалық бөлікте интернет шектеулері кеңейе түсті.
Ресейдің Цифрлық даму министрлігі байланыс операторларымен бірге «ақ тізім» құрып, интернетті өшіру кезінде де қолжетімді болатын сервистерді бекітті. Бұл тізімге «Госуслуги», Ozon, Wildberries, «Яндекс» такси мен жеткізу қызметтері, «ВКонтакте», «Одноклассники», сондай-ақ Max платформасы және басқа да ресурстар енгізілген.
Сарапшылар бұл тізімнің толықтай мемлекеттік бақылауда екенін айтады.
«На связи» жобасының дерегінше, Ресейдің кемінде 57 өңірінде мобильдік интернет бойынша жүйелі ақаулар бар. Санкт-Петербург, Сочи, Тула, Рязань, Краснодар, Саратов, Нижний Новгород және Уфа қалаларында да жиі шектеулер байқалған.
eQualitie ұйымының өкілі Леонид Юлдашев өңірлер арасында «ақ тізімді» қолданатын аймақтардың көбейіп келе жатқанын айтады. Алайда нақты есеп жүргізу өте қиын: егер азамат шектеу аймағында болса, мессенджерлер, VPN және байланыс құралдары істемегендіктен, ол жайлы хабар бере алмайды.
Материал авторы
