RUS
SMARTNEWS.KZ басылымының хабарлауынша, 13 қарашада елдегі кинотеатрларда көрсетіле бастаған «Ауру» фильмі Мәдениет және ақпарат министрлігінің талаптарына байланысты бірнеше маңызды көріністен айырылып, қысқартылған нұсқамен прокатқа шықты. Бұл туралы картинаның режиссері Айтөре Жолдасқали жеткізді.
Оның айтуынша, киноның мазмұнына тікелей әсер ететін бір толық эпизод пен бірнеше қысқа кадр алынып тасталған. Әсіресе финалдық көріністің кесіліп қалуы фильмнің мағыналық салмағын өзгертіп жіберген.
Режиссер жуық күндері туындының өзге нұсқасын шығару ықтимал екенін айтады. Қазір шығармашылық топ фильмге «18+» санатын қайтару бағытында жұмыс жүргізіп жатыр. Оның сөзінше, болашақта көрерменге қатты «блюрленген» нұсқа ұсынылуы мүмкін.
Дегенмен фильмнің жас шектеуі прокатқа шығаруға бір күн қалғанда «18+»-тен «21+» категориясына ауыстырылған. Бұл санаттағы картиналар тек 22:00 мен 06:00 аралығында көрсетілетіндіктен, оның жинағына әсер ететіні белгілі.
Режиссер Мәдениет министрлігі қойған бастапқы шектеулер тек қатыгездік эпизодтарына емес, оқиғаның мәнін ашатын маңызды көріністерге де қатысты болғанын атап өтті.
«Ауру» — Айтөре Жолдасқалидің екінші толықметражды фильмі. Сюжеттің негізінде: жас отбасы қарыздан құтылу үшін жалған ауру ойлап тауып, көпшіліктен ақша жинайды. Әлеуметтік желідегі танымалдық пен оңай табыс олардың ашкөздігін үдете түсіп, оқиға шиеленіске айналады.