RUS
SMARTNEWS.KZ басылымының хабарлауынша, Лос-Анджелесте актер Том Крузға өмірлік еңбегі үшін құрметті «Оскар» табысталды. Марапат 16 қарашада Governor Awards салтанатында берілді. Бұл рәсім негізгі «Оскар» мерекесінен бөлек өтеді.
Кино әлемінде 40 жылдан астам еңбек еткен Круз төрт рет номинацияға іліккенмен, бұған дейін жеңімпаз атанбаған. Ол «4 шілдеде туған жан» және «Джерри Магуайер» фильмдеріндегі басты рөлі үшін, «Магнолиядағы» екінші пландағы рөлі үшін, сондай-ақ «Топ Ган: Мэверик» фильмінің продюсері ретінде номинацияланған.
Құрметті «Оскар» – кино индустриясында ең мәртебелі сыйлықтардың бірі. Бұрынғы лауреаттар қатарында Чарли Чаплин, Джуди Гарленд, Федерико Феллини, Фрэнсис Форд Коппола мен Спайк Ли бар. Енді бұл мәртебелі тізімге Том Круз да қосылды. Голливудта оны пандемиядан кейін кинотеатрларды қайта жандандырудағы еңбегі үшін «кино сақтаушысы» деп атайды.
Том Круз тек басты рөлдерімен ғана емес, «Орындалмас миссия» сериясындағы қауіпті трюктерімен және Стэнли Кубрик пен Пол Томас Андерсон сияқты культ режиссерлермен бірлесе жұмыс істеуімен де танымал.