RUS
SMARTNEWS.KZ басылымының хабарлауынша, Талдықорғанда түнгі рейд кезінде Mitsubishi Pajero көлігінің жүргізушісі полиция талабын елемей, қашпақ болып әрекеттенді. Оқиға 16 қарашада сағат 03:00 шамасында болған.
Патрульдік полицейлер жүргізушіні тоқтатпақ болғанда, көлік Кабанбай батыр көшесімен жоғары жылдамдықпен және қауіпті бұрылыспен қозғалып бара жатқан. Заңды талапқа бағынбаған жасөспірім жылдамдықты үдетіп, қашуға тырысқан.
Полиция бірден қуғынға түсіп, бағыт-бағдарды өзге кезекшілікке жеткізген. Бірнеше минутқа созылған қуу нәтижесінде көлік көпқабатты үйдің ауласында бөгетке алынып, тоқтатылды.
Тексеру кезінде рөлде 2009 жылы туған, жүргізуші куәлігі жоқ жасөспірім отырғаны анықталды. Ол полиция бөліміне жеткізілді, ал ата-анасына оқиға туралы хабар берілді. Автомобиль айыптұраққа қойылды.
Жасөспірімнің заңды талапқа бағынбауы және көлікті жүргізу құқығы болмағаны бойынша материалдар сотқа жолданды. Сонымен бірге, кәмелетке толмаған баланың түнгі уақытта қараусыз жүруі және ата-анасының тәрбиелік міндетін тиісінше атқармауы бойынша оның ата-анасына да әкімшілік хаттама толтырылған.
Көлікте оның жасы шамалас үш досы болған. Олардың ата-анасына да дәл осы себеппен әкімшілік жауапкершілік қарастырылды.