RUS
SMARTNEWS.KZ басылымының хабарлауынша, Германия Израильге қару-жарақ жеткізуге тамызда енгізілген шектеуді алып тастады. Бұл шешім 24 қарашадан бастап күшіне енеді. Бұл туралы үкімет өкілі Штефан Корнелиустың мәлімдеді.
Берлин шектеуді жоюды 10 қазаннан бері Израиль мен ХАМАС арасындағы атысты тоқтату режимінің «соңғы апталарда тұрақтануымен» түсіндірді. Алайда бұл Германия енді кез келген өтінімді автоматты түрде мақұлдайды дегенді білдірмейді. Үкімет қару экспортын әр өтініш бойынша жеке қарауды жалғастыратынын және аймақтағы жағдайға қарай әрекет ететінін атап өтті.
Корнелиус Германия Таяу Шығыста тұрақты бейбітшілік орнату бастамаларын әрі қарай қолдайтынын және Газа тұрғындарына инфрақұрылымды қалпына келтіру бойынша көмек көрсететінін айтты.
Израильдің сыртқы істер министрі Гидеон Саар Берлиннің «жартылай эмбаргоны» алып тастағанын құптап, өзге елдерді де Германияның қадамын қайталауға шақырды.
2023 жылғы 7 қазандағы ХАМАС шабуылы соғыстың қайта басталуына себеп болғаннан кейін Германия Израильге әскери қолдауын күшейткен еді. Сол кезеңде канцлер Олаф Шольц басқарған үкімет Израильге шамамен 500 млн еуро көлемінде қару-жарақ жеткізген.
Фридрих Мерц үкіметі кезінде де жеткізілімдер жалғасты, бірақ көлемі азайды. Сонымен бірге ресми Берлин Газадағы гуманитарлық дағдарысты алға тартып, Израильдің әскери тактикасына жиірек сын айта бастаған.