Астананың бұрынғы әкімі Алтай Күлгінов LRT туралы пікірін білдірді

Экс-әкім елордадағы LRT жобасына қатысты үн қатты.

gov.kz

SMARTNEWS.KZ басылымының хабарлауынша, Эстониядағы Қазақстанның төтенше және өкілетті елшісі, Астананың бұрынғы әкімі Алтай Күлгінов елордадағы LRT жобасына қатысты пікірін білдірді.

Ақордада өткен шарадан кейін журналистер Күлгіновтен құрылыс жұмыстары аяқталуға жақындаған LRT-ның қазіргі жағдайына бағасын сұрады.

«Бұл жобаны бағалайтын – қала тұрғындары. Өзім де осы жобаға 3,5 жыл бойы араластым. Көріп тұрғандарыңыздай, жұмыс аяқталуға жақын. Жақын уақытта тұрғындар қоғамдық көлік ретінде пайдаланады деп үміттенемін. Бұл қаладағы көлік жүктемесін азайтудың бір тетігі болады», – деді ол.

Алтай Күлгінов 2019 жылдың 13 маусымынан 2022 жылдың 8 желтоқсанына дейін Астананы басқарды. Ол 2022 жылдың қыркүйегінде LRT жобасын үздіксіз қаржыландыру жағдайында екі жыл ішінде толық аяқтауға болатынын айтқан.

Қазіргі әкім Жеңіс Қасымбек жуырда LRT желісі Қосшыға дейін ұзартылатынын мәлімдеді. Оның айтуынша, күн сайын Қосшыдан Астанаға 15–20 мың көлік кіріп, жолдарға айтарлықтай салмақ түсіреді.

Еске салайық, 29 қыркүйекте елордада LRT-ның тестілік режимдегі жұмысы басталды. CTS компаниясы тұрғындарға эстакада мен жолаққа шығудың өмірге қауіпті екенін ескерткен. Биыл көктемде әкім Қасымбек LRT-де бір реттік сапар құны 100-200 теңге болуы мүмкін екенін мәлімдеген.