RUS
SMARTNEWS.KZ басылымының хабарлауынша, Талдықорғанда 12 жастағы қызды азғындыққа итермелемек болған 29 жастағы ер адам ұсталды. Оны қоғам белсенділері арнайы ұйымдастырылған эксперимент кезінде әшкереледі.
Белсенділер жасөспірім атынан жалған аккаунт ашып, парақшада баланың жасы – 12-де екенін ашық көрсеткен. Бірнеше сағаттың ішінде он шақты ер адам хабарласып, стористі бақылай бастаған. Солардың ішінде бір күдікті ерекше белсенділік танытқан.
Желіде өзін «Елдос Каримов» деп таныстырған ер адам әуелі бейтарап амандасып, кейін улы әрекетке көшкен: балаға интим сипаттағы сұрақтар қойып, жыныс мүшесінің суреттерін жіберген. Сондай-ақ дәл сондай суретті қыздан да талап еткені анықталды.
Жасөспірім үйде жалғыз екенін білген күдікті бірден кездесу орнына баруға келіседі. Белгіленген мекенжайда оны белсенділер мен тұрғындар күтіп тұрған. Олар ер адамның балаға жазған хабарламаларын дәлел ретінде көрсетіп, әрекетін әшкере етті. Соған қарамастан күдікті кінәсін мойындаудан бас тартқан.
Оқиға орнына полиция шақырылып, қылмыстық әрекет жасауға талпыныс дерегі тіркелді. Тексеру барысында «Елдос Каримов» деген жалған есімнің артында 29 жастағы Қасым Диас Аянұлы тұрғаны анықталды. Тергеу мәліметінше, ол қыздың жасын нақты білген және бәрін саналы түрде жасаған.