RUS
SMARTNEWS.KZ басылымының хабарлауынша, Шығыс Қазақстан облысында ауылдық округ әкімі тұрғындарды балағаттағаны үшін тағы да жауапкершілікке тартылды. Қуаныш Төлеуханға қатысты тәртіптік шаралар облыс әкімінің тапсырмасымен күшейтілді.
Қазан айының басында әлеуметтік желіде тараған видеода Шілікті ауылдық округінің әкімі тұрғындармен сөз таласы кезінде айқайлап, боқауыз сөз айтқаны анық көрінген. Оқиғадан кейін шенеунікке әкімшілік айыппұл салынды, іс этика кеңесінде қаралды.
ШҚО әкімі Нұрымбет Сақтағанов брифингте бұл жағдайға қатысты пікір білдіріп, мемлекеттік қызметтегі мұндай әрекеттер жазасыз қалмауы керек екенін айтты.
Облыс басшысының сөзінше, әкімдік Қуаныш Төлеуханға қатаң сөгіс жариялаған, сондай-ақ осы бағытқа жауапты оның орынбасары да тәртіптік жауапкершілікке тартылған. Кадр қызметтеріне мемлекеттік қызметкерлердің жұмыс орнындағы этика талаптарын тұрақты түрде еске салып отыру тапсырылды.
Бұған дейін полиция 36 жастағы ауыл акимін ҚР Әкімшілік құқық бұзушылық туралы кодексінің 434-бабы 1-бөлігі бойынша, яғни қоғамдық орында былапыт сөйлеу фактісі үшін әкімшілік жауапкершілікке тартқан. Төлеухан кейін ауыл тұрғындарынан кешірім сұраған.