Астанада үш жасар қыздың өлімі: стоматологтардың әрекеті сотқа жетті

SMARTNEWS.KZ басылымының хабарлауынша, Астанада үш жасар қыздың стоматологиялық клиникада ұзақ анестезиядан кейін көз жұмуына қатысты қылмыстық іс сотта қаралып жатыр. Қайғыдан қан жұтқан ата-ана бұл трагедияны болдырмауға болар еді деп есептейді.

Марқұм қыздың әкесі Талғат Құмаровтың айтуынша, 2024 жылдың 30 қазанында балаға барлық дерлік тісі толық жалпы седациямен — Севоран препараты арқылы емделген. Әке қыздың бұған дейінгі қабылдауда да әдеттегіден ұзақ уақыт есін жия алмағанын, сол кезде клиника жұмысына күмән туғанын айтады.

Тексеру кезінде ультрадыбыстық зерттеу мен талдаулар жасалғанына қарамастан, клиника дәрігерлері 20 тістің 18-ін бір сессияда емдеуді жөн көрген.

«Бізге бұл қалыпты тәжірибе, балаларды ұйықтатып, барлық тісті бірден емдей береміз деді. Бірақ мұны кезең бойынша жасауға толық мүмкіндік болды», — дейді қыздың әкесі.

Құмаровтың айтуынша, седация таңғы 09:10-да басталған. Сағат 14:00-ге қарай анасы баланың оянбай жатқанын байқайды. Шұғыл жедел жәрдем шақырылған. Дәрігерлер 45 минут бойы қызды реанимациялауға тырысқанымен, жүрек соғысы мен ми ісінуін тоқтата алмаған.

Фармакологиялық бақылау қызметі алғашқы медициналық көмек көрсету кезінде бірқатар өрескел бұзушылықтар анықтаған.

Dent-Park клиникасының директоры Надежда Хон анестезиолог сол күні жұмыстан босатылғанын растады. Алайда процедураны жүргізген стоматолог әлі де пациент қабылдай береді.

Жәбірленушілердің өкілі Руслан Айтжанов екі сараптаманың — сапаны бақылау департаментінің және сот-медициналық талдаудың — анестезиолог та, стоматолог та қателікке жол бергенін көрсеткенін айтты. Соған қарамастан, қылмыстық жауапкершілікке тек анестезиолог тартылған.

Тексеру нәтижесінде анықталған бұзушылықтар:

анестезиологтың балалармен жұмыс істеуге қажетті 7 жылдық тәжірибесі болмаған;

клиникада жарамдылық мерзімі өткен және сертификатталмаған препараттар болған;

балаларға арналған седацияның рұқсат етілген ұзақтығы бұзылған;

ем көлемінің шамадан тыс ұлғаюы операция уақытын қауіпті деңгейге дейін созған.

Қызынан айрылған отбасы дәрігерлерді жазалау емес, аналогиялық жағдайларды болдырмау басты мақсат екенін айтады.

«Біз кек қайтаруды көздеп жүрген жоқпыз. Бірақ бала қайтыс болды. Біз әділдік орнауын, мұндай оқиға енді қайталанбауын қалаймыз», — деді Айтжанов.

Анестезиологтың адвокаты сотқа келмегендіктен, отырыс кейінге қалдырылды. Қыздың туыстары сот барлық қатысушының әрекетіне құқықтық баға береді деп үміттенеді.