«АҚШ-қа бір рет болсын рахмет айтпады»: Трамп Киевке шүйлікті

SMARTNEWS.KZ басылымының хабарлауынша, АҚШ президенті Дональд Трамп Украина басшылығын Вашингтон көрсеткен қолдауға «ешқашан алғыс білдірмеді» деп айыптады. Бұл туралы ол жексенбі күні Truth Social платформасында жазды.

Трамп өз сөзінде АҚШ «болуы тиіс емес соғысты» мұраға алғанын атап өтіп, қантөгістің ауқымына назар аударды.

Президенттің айтуынша, «миллиондаған адам құрбан болған бұл соғыста ешкім ұтқан жоқ», ал Киевтің қазіргі басшылығы АҚШ-тың күш-жігерін бағаламаған.

Бұл мәлімдеме Вашингтон Украинаға АҚШ әзірлеген 28 тармақтан тұратын бейбіт ұсынысты Алғыс айту күніне дейін қабылдауды талап етіп отырған күрделі кезеңге тұспа-тұс келді.

Өткен демалыста Швейцарияда АҚШ-тың жоғары лауазымды өкілдері, соның ішінде мемлекеттік хатшы Марко Рубио мен арнайы өкіл Стив Уиткофф, украиналық делегациямен келіссөздер өткізді. Соғыс қимылдарын тоқтатуға бағытталған бұл кездесулер туралы америкалық тарап «оң және конструктивті өтті» деп хабарлады.

Келіссөздер аяқталған соң Рубио олардың «айтарлықтай ілгерілеуіне» қол жеткізілгенін мәлімдеді. Оның сөзінше, әлі шешілмеген мәселелер бар, бірақ қазіргі прогресс бір апта бұрынғы жағдайдан едәуір алға жылжыған.

Жексенбі кешінде Ақ үй тараптар жариялаған бірлескен мәлімдемені таратты. Онда АҚШ пен Украина консультациялардың «өнімді өткенін» атап өтті.

23 қарашада Женевада өткен кездесуде украиндық делегация АҚШ-қа және президент Трампқа «соғысты тоқтату үшін атқарған қажырлы еңбегі үшін» алғыс білдіргені көрсетілген. Тараптар қауіпсіздік пен тұрақтылықты қамтамасыз ететін ұзақ мерзімді бейбіт келісімге қол жеткізуге мүдделі екенін растады.

Осыған дейін Женевада Ұлыбритания, Франция, Германия, Украина және АҚШ өкілдері Ресей мен Украинаның қақтығысын реттеу мәселесін талқылаған болатын.