RUS
SMARTNEWS.KZ басылымының хабарлауынша, Алматыда көлік салығын төлемеген борышкерлерге қатысты кең көлемді рейд жүріп жатыр. Қалалық Мемлекеттік кірістер департаменті, полиция және жеке сот орындаушыларының өңірлік палатасы «Борышкер» атты жедел алдын алу шарасын бастағанын мәлімдеді.
Борышкерлердің көліктері «Сергек» камералары арқылы анықталып, жеке сот орындаушыларының қаулысы болған жағдайда бірден айыптұраққа қойылады. Көлік иесі оны тек қарызын толық өтеген соң ғана қайтарып ала алады.
Департаменттің мәліметінше, Алматыдағы көлік салығы бойынша жалпы берешек 4,5 млрд теңгеге жеткен. Қарыздың негізгі бөлігі қозғалтқыш көлемі 4000 текше сантиметрден асатын көліктерге тиесілі.
Мемлекеттік кірістер департаменті жүргізушілерді уақыт оздырмай салық қарызын өтеуге шақырады. Әйтпесе көліктің айыптұраққа жеткізілуі ғана емес, сот орындаушылар қызметінің шығындары да қосылады.