RUS
SMARTNEWS.KZ басылымының хабарлауынша, Сауда және интеграция вице-министрі Айдар Әбілдабеков Қазақстандағы азық-түлік бағасының көршілес елдерге қарағанда неге қымбат екенін түсіндірді. Бұл туралы Nur.kz жазды.
Үкіметтегі брифингте оған отандық өнімдердің, мысалы, картоп пен жұмыртқаның — шетелде арзан болуына қатысты сұрақ қойылды.
Журналист Германия мен Қазақстан арасындағы баға айырмашылығын көрсеткен видеоны мысал етіп, халық үшін азық-түлік құнын қалайша қолжетімді ету жоспарланғанын сұрады.
Вице-министрдің айтуынша, ел ішіндегі баға айырмашылығының өзі айтарлықтай — Астана мен Алматы бағасы екі бөлек, ал Шымкентте көптеген азық-түлік едәуір арзан. Бағаға тасымал, сақтау шығындары, сондай-ақ өңірлердегі сауда үстемесінің әртүрлілігі тікелей әсер етеді.
Оның сөзінше, оңтүстікте маржа төмен, халық көп болғандықтан, саудагерлер тауарды арзанырақ сатады. Ал солтүстікке жеткенше шығын көбейеді, сол себепті баға да өседі.
Әбілдабеков Германиямен салыстыруды «жекелеген жағдайлар» деп атап, нарықтағы бағаның өз ішінде де құбылып тұратынын айтты.
«Астананың өзінде бір ғана судың бағасы дүкеннен дүкенге өзгереді. Баға ұнамаса — алмаңыз. Басқа дүкенге барып, басқасын алыңыз. Таңдау еркі бар», — деді ол.
Вице-министр отбасы болып апта сайын базар аралап, тұрақты сатушылардан сатып алатынын да атап өтті.
«Кім қымбат дүкеннен алғысы келсе — өз еркі», — деді ол. Бірақ өзінің қанша қаражат жұмсайтынын нақтыламады.