RUS
SMARTNEWS.KZ басылымының хабарлауынша, Түркістан қаласында субсидияланатын жұмыс орындары арқылы бюджет қаржысын заңсыз иемдену ісіне нүкте қойылды. Қылмыстық істі Қаржылық мониторинг агенттігінің облыстық департаменті тергеген.
Істе «Еңбек мобильділігі орталығының» бұрынғы жетекшісі, осы орталықтың бөлім қызметкері және бірнеше кәсіпкер жауапқа тартылды. Тергеу деректеріне қарағанда, олар азаматтарды қағас жүзінде жұмысқа орналастырып, мемлекеттік қолдау бағдарламасын пайдалану арқылы қаражатты жүйелі түрде қолма-қол ақшаға айналдырып отырған.
Схема былай жұмыс істеген: орталықтың қызметкері кәсіпкерлердің ЭЦҚ-ларын қолдана отырып, субсидиялау бағдарламаларына жалған өтінімдер жіберген. Мақұлданған соң, шын мәнінде ешқандай еңбек міндетін атқармаған «қызметкерлерді» жұмысқа қабылдау туралы бұйрықтар рәсімделген. Кәсіпкерлер туыс-таныстарын тартып, банк шот аштырған — бұл шоттарға ай сайын жалған табельдер негізінде «жалақы» аударылып отырған. Кейін қаражат қолма-қол алынып, қатысушылар арасында бөлінген.
Барлығы 78 адам қағаз жүзінде ғана жұмысқа тұрғызылған. Залал көлемі 49 млн теңгеден асқан.
Сот үкімі бойынша:
үш негізгі фигурант 4 жыл 6 айдан 5 жылға дейін бас бостандығынан айырылды;
екі кәсіпкерге 4 жыл 6 ай мерзімге бас бостандығын шектеу жазасы белгіленді.
Мемлекетке келтірілген шығын толық өтелген. Үкім заңды күшіне енген жоқ.