RUS
SMARTNEWS.KZ басылымының хабарлауынша, Жоғары аудиторлық палата Солтүстік Қазақстан облысына бөлінген қаражаттың және мемлекеттік активтердің қолданылуын тексеріп, нәтижесін жариялады.
Аудит өңірдің соңғы бес жылдағы негізгі әлеуметтік-экономикалық көрсеткіштерінде өсім барын көрсетті: жалпы өңірлік өнім 2020 жылдан бері 69%-ға ұлғайған, жұмыссыздық 0,4%-ға төмендеген, ең төмен күнкөріс деңгейінен төмен табыс алатындардың үлесі 2,3 пайыздық тармаққа азайған. Тұрғын үй қоры да 600 мың шаршы метрге артқан.
Алайда оң динамикаға қарамастан, аудит өңірдегі өмір сапасына әсер ететін бірқатар жүйелі проблеманы анықтады.
Облыста халықтың табиғи өсімі құлдыраған, көшіп кетушілер саны жоғары. Білім саласында үш ауысымды мектептер мен апатты ғимараттар мәселесі шешілмеген. 17 мектепте спорт залы жоқ, 24 мектепте пән кабинеттері жеткіліксіз. Медициналық нысандардың 74%-ы тозған күйде.
Шағын және орта бизнес саны артқанымен, олардың жалпы өңірлік өнімдегі үлесі төмендеген. ЖАП төрағасы Әлихан Смайылов көтерме және бөлшек сауда ұйымдарының табысы 100 млрд теңгеге азайғанын атап өтті. Оның айтуынша, бұл жергілікті бюджеттің мүмкіндіктерін тежеп отыр және көлеңкелі айналымның күшейгенін көрсетеді.
«Qyzyljar» арнайы экономикалық аймағында инженерлік инфрақұрылым жоқтығынан бірқатар нысан уақытында іске қосылмаған. Соған қарамастан, жергілікті бюджеттен маңызы төмен жобаларға — әкімшілік ғимараттарды жаңартуға 7,3 млрд теңге, театр құрылысына 7 млрд теңге — қаржы бөлінген.
38 тірек ауыл орталықтандырылған ауыз суға әлі қосылмаған. Салынған 79 нысанның 22-сі (10 млрд теңге) пайдаланушы ұйымдарға берілмеген. Жол және жолаушылар көлігі инфрақұрылымы да жүйелі бақылауды қажет етеді.
«Солтүстік» әлеуметтік-кәсіпкерлік корпорациясының жұмысы 1 млрд теңге шығынға әкелген тиімсіз жобалармен ерекшеленген. Бухгалтерлік есепте 24 млрд теңгеден асатын бұзушылық анықталды. Мемлекеттік сатып алуда да 5,5 млрд теңге бір көзден сатып алу арқылы рәсімделген, қосалқы мердігерлік шектеулері сақталмаған.
Аудит қорытындысы бойынша:
– 28,3 млрд теңгеге қаржылық бұзушылық тіркелді;
– 112,4 млрд теңге бюджет қаражаты тиімсіз жоспарланып, тиімсіз жұмсалған;
– 111 іс әкімшілік жауапкершілікке негіз болып, кейбір материалдар құқық қорғау органдарына жолданады.