RUS
SMARTNEWS.KZ басылымының хабарлауынша, Бішкекте Украина елшілігі орналасқан ғимаратты алып LED-экранмен жауып тастады. Бұл құрылым Ресей президенті Владимир Путиннің Қырғызстан астанасына келуіне бірнеше күн қалғанда орнатылған.
Экран елшілікке қарама-қарсы, Қырғызстан президентінің жаңа резиденциясы «Ынтымак Ордоның» дәл жанында бой көтерген. Конструкция бірнеше қабат биіктігіндей, ал резиденция аумағынан экранның өзіне де, оның алдындағы көшеге де толық көрініс жоқ. Дегенмен құрылым Украина туын көзден тасалайтыны анық байқалады.
20 қарашада журналист Григорий Пырлик оның орнатылғанын хабарлап, фотоларын жариялаған. Экран Украина туы тұрған аумақты толық жауып тұр.
Григорий Пырлик суреті
Президент әкімшілігі экран ресми шараларды визуал тұрғыда сүйемелдеуге арналғанын мәлімдеді. Алайда бірқатар медиа оны Путиннің сапарымен тікелей байланыстырды. Украина елшілігінің кеңесшісі Денис Автономов та «байланыс бар екені көзге ұрып тұр» деген пікір білдірді.
Саяси сарапшы Турат Акимов «Азаттыққа» берген сұхбатында экранның пайда болуын Ресей президентін күзететін Федеральды күзет қызметінің талабы болуы мүмкін деп болжады. Оның айтуынша, арнайы қызмет өкілдері сапар алдында ауданның қауіпсіздігін тексеріп шығып, елшілік жағынан қауіп болуы ықтимал деп шешуі мүмкін.