RUS
SMARTNEWS.KZ басылымының хабарлауынша, Атыраудағы жекеменшік мектептің 11-сынып оқушысы қатты жарақат алғаннан кейін, оқиға жасырылды деген айып та тағылып отыр. Мектеп басшылығы болса, тексеріс жүріп жатқанын мәлімдеді. Бұл туралы «Ақ Жайық» жазды.
Әлеуметтік желіде оқушының жарақаттанғаны туралы ақпарат тарағаннан кейін дабыл көтерген — қыздың әпкесі. Оның айтуынша, сіңлісі мектептегі әжетханада басын унитазға соғып, ауыр жараланған. Желіде жарияланған суретте басы қанды таңғышпен оралған.
Айтуынша, оқиға орнындағы қан іздерін мектеп қызметкерлері жуып тастап, оқушылардан бұл туралы ешкімге айтпауды сұраған. Бастапқыда қыз да отбасына «тайып жығылдым» деп жалтарғанымен, кейін өз сыныптастарымен жанжалдасып қалған сәтте қатарластары итеріп жібергенін мойындаған.
Әпкесі мектептің сол күні ата-аналарға хабарласпағанын, сынып жетекшісі де, мектеп әкімшілігі де оқиға туралы тіс жармағанын айтады. Отбасы жағдайды тек кешкісін, басқа ата-анадан естіген.
Жарақат алған оқушының мінезі өзгеріп, ашылып сөйлесуден қашқақтағаны да туыстарының күдігін күшейткен.
Атырау облысының Білім басқармасы мектепте ішкі тергеу басталғанын растады. Олар қызметкерлердің әрекеті «дұрыс әрі жедел» болғанын алға тартады. Ведомство дерегінше, оқушыға алғашқы медициналық көмек көрсетіліп, дереу дәрігерге бару ұсынылған, бірақ ол бауырымен бірге ғана баратындарын айтып, бастапқыда бас тартқан.
Басқарма мектепте қауіпсіздік шаралары күшейтіліп жатқанын хабарлады.