RUS
SMARTNEWS.KZ басылымының хабарлауынша, Қазақстанның Каспий құбыр консорциумы инфрақұрылымына жасалған шабуылға байланысты жасаған наразылығына Украина ресми түрде жауап берді. Киев Астананың алаңдаушылығын алғанын мәлімдеп, өз әрекеттерінің бағытын түсіндірді.
Украина Сыртқы істер министрлігі бұл операциялар Қазақстанға немесе өзге де мемлекеттерге қарсы емес екенін айтты. Мәлімдемеде барлық күш Ресейдің толыққанды әскери агрессиясына қарсы қорғанысқа жұмылдырылғаны атап өтілді. Киевтің айтуынша, әскери қимылдар БҰҰ Жарғысының 51-бабы бойынша өзін-өзі қорғау құқығына сүйенеді.
Украина ресейлік әскери-өнеркәсіптік әлеуетті әлсірету арқылы соғысты тоқтатуға тырысып жатқанын жеткізді. Қара теңіз аймағындағы тұрақсыздықтың бірден-бір көзі ретінде Ресей аталды.
Министрлік сонымен қатар Қазақстанның Ресейдің Украинадағы азаматтық нысандар мен энергетикалық инфрақұрылымға жасаған шабуылдарын айыптамағанын еске салды. Киев елдерді соғысты тоқтатуға ықпал етуге шақырды.
Мәлімдеме соңында Украина қазақ халқына деген құрметін және екі ел арасындағы тарихи байланыстарға сай, прагматикалық әрі достық қатынастарды дамытуға мүдделі екенін айтты.
«Қорытындылай келе, қазақ халқына деген өзгермес құрметімізді және халықтарымыз арасындағы тарихи тұрғыдан берік байланыстар деңгейіне сәйкес келетін, Қазақстан Республикасымен достық әрі прагматикалық қатынастарды дамытуға деген ұмтылысты растаймыз», - деді Украина СІМ.
Оқиға Каспий құбыр консорциумының акваториясында ВПУ-2 құрылғысы дроң-қайықтар шабуылынан зақымданғаннан кейін туындады. КҚК мұнай тиеуді тоқтатты, танкерлер аймақтан шығарылды. Зардап шеккендер жоқ. Қазақстанның Энергетика министрлігі жағдайды түсіндіріп, Сыртқы істер министрлігі Украинаға ресми наразылық нотасын жолдаған.