RUS
SMARTNEWS.KZ басылымының хабарлауынша, Абай облысының полиция департаменті №22 бағыттағы автобуста болған оқиғаға қатысты тексеріс нәтижесін жариялады.
Instagram-дағы mysemey парағында жазылғандай, кәмелетке толмаған жолаушы жолақысын уақтылы төлей алмаған, себебі телефоны интернетке қосылмаған. Баланың байланыс қалпына келгенше күтуін сұрауына қарамастан, кондуктор оны түн мезгілінде күштеп түсірген.
Полицияның мәліметінше, оқиға 24 қараша 2025 жылы болған. Жасы он алтыға толмаған, ата-анасыз жалғыз келе жатқан баланы қоғамдық көліктен түсіру – тасымалдау ережелерінің тікелей бұзылуы.
Полиция департаменті кондуктордың әкімшілік жауапкершілікке тартылып, 5 АЕК көлемінде айыппұл салынғанын мәлімдеді.
Ведомство мұндай әрекеттердің жол жүру талаптарына қайшы екенін атап өтті. Тасымалға қатысты профилактикалық жұмыс басталып, жолаушыларға қызмет көрсету сапасын күшейту талап етілді.