RUS
SMARTNEWS.KZ басылымының хабарлауынша, Астанада ұзақ анестезиядан кейін көз жұмған үш жастағы баланың өліміне байланысты сот процесінде Dent Park Ortho клиникасының директоры Надежда Хоннан жауап алынды. Ол сотқа денсаулығына байланысты онлайн қосылды.
Хонның айтуынша, ол жұмысқа 13:38 шамасында келген. Киім ауыстыру кезінде-ақ дәрігерлер оған баланың наркоздан оянбай жатқанын хабарлаған.
«Маған пациенттің оянбай жатқаны айтылды. Сол сәтте бірден жедел жәрдем шақырылды. Өзім медициналық немесе реанимациялық көмек көрсеткен жоқпын», – деді клиника басшысы.
Сот барысында директордың 3 қазаннан бері қызметте екені, кадр қабылдау және жұмыстан шығару өкілеттігін иеленгені еске салынды.
Прокурор медбике Бушинаның міндетті сертификатсыз жұмыс істегенін атап, бұл қызметкерді кім қабылдағанын сұрады.
Хон оның жұмысқа қабылдануына қатысы жоғын айтып, «Бушинаны мен емес, бұрынғы директор мен басқарушы директор алған» деп жауап берді.
Айта кетейік, оқиға 2024 жылғы 30 қазанда болды. Талғат Құмаровтың айтуынша, қызы жоспарлы түрде седациямен тіс емдеткен. Анестезия ретінде «Севоран» қолданылған. Бала есін жимай, жүрегі тоқтап, миы ісінген. Реанимация нәтиже бермеген.
Прокурор Еркебұлан Шалқаровтың сөзіне қарағанда, жоспардан тыс тексеру кезінде клиникада анестезияға дайындық, кабинеттердің жабдықталуы, медициналық стандарттардың сақталуы бойынша өрескел кемшіліктер анықталған. Соның ішінде — шұғыл көмекке қажет жабдықтардың толық болмауы.
Қыздың әкесі мен отбасының адвокаты: егер талаптар сақталып, ұзақ седациямен барлық тісті бір сессияда емдеу тәжірибесі қолданылмаса, трагедияның алдын алуға болатын еді деп санайды.
Денсаулық сақтау министрлігі осы оқиғадан кейін стоматологияларды жаппай тексеру туралы шешім қабылдай ма — ведомствоның ұстанымы әзірге жарияланған жоқ.