RUS
SMARTNEWS.KZ басылымының хабарлауынша, ҚР Парламенті Мәжілісінің төрағасы Ерлан Қошанов үкімет мүшелерінің депутаттардың сұрақтарына берген жауабы оны қанағаттандырмағанын айтты.
Бүгін Мәжілісте вице-премьер Қанат Бозымбаев депутаттардың өңірлік сапарлары кезінде азаматтардан түскен өтініштердің қаралуы жөнінде есеп берді. Басқа министрлер де жауап беруге қатысқанымен, олардың айтқандары Мәжіліс төрағасын қанағаттандырмаған.
Қошановтың сөзінше, кей сұрақтарға берілген жауаптар сенімді болмаған. Ол депутат сұрақтарының артында халықтың нақты мәселелері тұрғанын еске салды:
«Бүгін шынында да көп сұрақ қойылды. Көп ұсыныстар айтылды, талқыланды егжей-тегжейлі. Десе де бүгін біраз сұраққа Үкімет тарапынан берілген жауаптар әрине, мардымсыз болғанын атап айту керек. Нақты сұрақтарға көбіне сырғытпа, жалпылама жауаптар берілді. Нақты істерді көрсете алмады. Ол туралы жаңа фракцияның жетекшілері өз сөйлеген сөздерінде қатты сынға алып, осының бәрін атап өтті.
Қанат Алдабергенұлы (вице-премьер - ред.), бұл сұрақтардың барлығы өңірлерге барып келгеннен кейін Үкіметке, Премьер-министрдің атына жіберген болатынбыз. Мұның бәрі - тұрғындардың мыңдаған сұрақ, талап-тілектері. Өкінішке орай, мардымды жауап ала алмадық. Бірақ бүгін біз осы мәселелердің орындалу барысын қарап жатырмыз. Енді келесі жылдың басында тағы да кездесу болады. Онда біз осы мәселелердің нақты нәтижесін күтеміз. Өңірлерде мәселелер көп, шыны керек. Тұрғындар мен депутаттардың көтерген мәселелері байланысып жатыр», – деді спикер.
Сонымен қатар, Қошанов үкімет мүшелеріне өңірлерге барып, жергілікті деңгейде шешім қабылдауды міндеттеді.