RUS
SMARTNEWS.KZ басылымының хабарлауынша, Солтүстік Қазақстан облысында мектеп асханаларына жаппай тексеріс басталды. Бұған Петропавлдағы гимназиялардың бірінде оқушылардың тамақтан жәндіктер тауып алу оқиғасы себеп болды.
КТК телеарнасының хабарлауынша, балалар компот пен макароннан өлі жәндіктерді көрген соң ата-аналар дабыл қаққан. Осыдан кейін облыс әкімі Ғауез Нұрмұхамбетов барлық мектеп асханасын шұғыл тексеруді тапсырды.
Облыстық білім басқармасының басшысы Айнагүл Сұрағанованың айтуынша, ата-аналардан тағам сапасына қатысты бірнеше шағым түскен. Соған байланысты өңірде бақылау күшейтіліп, арнайы ведомствоаралық комиссия жұмысқа кірісті.
Комиссия құрамында қоғамдық ұйым өкілдері, ата-аналар, дәрігерлер және білім бөлімдерінің қызметкерлері бар. Тексеру тобы мектептердегі құжаттардың талапқа сай жүргізілуін, асхананың санитарлық жағдайын, ыдыс-аяқтың тазалығын қарайды. Ал тағам блогына кіру құқығы бракераж комиссиясына ғана тиесілі.
Мамандар өңірдегі шамамен 300 мектепті аралап шығады. Жауаптылар тексеріс оқу жылының соңына дейін жалғасатынын мәлімдеді.
Бұған дейін Петропавлдағы жеке мектепте балаларға жәндіктері бар тағам берілгені туралы хабарланған. Кейін ата-аналар шағымынан соң Абай атындағы қазақ мектеп-гимназиясының директоры қызметінен босатылды.