RUS
SMARTNEWS.KZ басылымының хабарлауынша, Ресей президенті Владимир Путин Украина шығысындағы аумақтарды басып алуды тоқтатпайтынын мәлімдеді. India Today телеарнасына берген сұхбатында ол өзін «ДХР» және «ЛХР» деп атайтын Донецк пен Луганск аймақтары «қалай болғанда да» Мәскеудің бақылауына өтетінін айтты.
Путиннің сөзінше, бұл өңірлердің тұрғындары «тәуелсіздікке дауыс берген», сондықтан украин күштері аймақтан өзі кетпесе, Ресей оны қарулы жолмен «босатуға» дайын. Ол өз мәлімдемесін ТАСС агенттігі таратқан. Сұхбат Путиннің 4 желтоқсанда басталатын Үндістан сапарына орайластырылған.
АҚШ президенті Дональд Трамп әкімшілігі ұсынған соғыс тоқтату жоспары да Донбасс мәселесін қозғайды: Вашингтон ұсынған құжат Донецк пен Луганскінің Ресей бақылауына өтуін қарастырады. Алайда Кремль талапты жеткіліксіз деп санайды, себебі Мәскеу ресми түрде Запорожье мен Херсон облыстарын да өз аумағы деп танытуға тырысып отыр. Қырым 2014 жылдан бері Ресей қол астында, Луганскінің үлкен бөлігі де солай. Киев өз аумақтарын беруден үзілді-кесілді бас тартып, тек қазіргі майдан шебіне қатысты уақытша тоқтамды талқылауға дайын екенін айтады.
Путин сұхбатта 2 желтоқсанда Кремльде өткен, АҚШ президентінің өкілдері Стив Уиткофф пен Джаред Кушнермен келіссөздердің нәтижесіне де тоқталды. Оның айтуынша, тараптар Трамптың бастапқы 28 тармақтан тұратын жоспарын жекелеген элементтер бойынша талқыға салғанымен, кейбір түйінді мәселеде бір мәмілеге келе алмаған. АҚШ кейін бұл құжатты төрт бөлек «пакетке» бөлуді ұсынған. Бұған дейін жоспар 19 тармаққа қысқарды деген ақпарат тараған, бірақ ресми құжаттар жарияланған жоқ.
Ресей басшысы Вашингтон ұсынған жоспардағы тағы бір тармақты – Мәскеудің G7 тобына қайта қосылу идеясын да қабылдамады. Путин өз сөзінде «бұрын да G8 саммиттеріне жиі бармағанын» алға тартты.
4 желтоқсанда Кремль Путиннің жыл сайынғы үлкен баспасөз конференциясы мен «тікелей желісі» 19 желтоқсанда өтетінін хабарлады.