RUS
SMARTNEWS.KZ басылымының хабарлауынша, Президент Қасым-Жомарт Тоқаев «Алтын сапа», «Парыз» жүлделері мен «Қазақстанның үздік тауарлары» республикалық конкурсының жеңімпаздарын марапаттау рәсімінде арнайы награда – «Мейірім» орденін тағайындау шешімін жариялады.
Мемлекет басшысы кәсіпкерлердің сапалы өнім өндіруі, әлеуметтік жауапкершілік пен қайырымдылыққа белсенді қатысуын ерекше атап өтті.
«Бүгін еліміздің бизнес қауымдастығы үшін өте маңызды күн деуге болады. Біз биыл да қалыптасқан дәстүрге сай «Алтын сапа», «Парыз», «Қазақстанның үздік тауары» байқауларының жеңімпаздарын марапаттап жатырмыз. Баршаңызды шын жүректен құттықтаймын!
Осы жердегі әр кәсіпкердің жетістігі – ел мерейінің айқын көрінісі. Сіздер сапалы өнім өндіріп, экономиканы дамытуға және халықтың әл-ауқатын арттыруға зор үлес қосып келесіздер. Әлеуметтік жауапкершілікті терең сезініп, қайырымдылық істерге белсене атсалысып жүрсіздер. Бұл – өз кәсібіне адал, іскер және нағыз отаншыл азаматтарға тән асыл қасиет деп санаймын. Мемлекет Сіздерге әрдайым қолдау көрсетуге дайын», – деді Тоқаев.
Президенттің айтуынша, 29 қазаннан бастап Қазақстанда кәсіпкерлер күні ресми мереке ретінде бекітілген. «Мейірім» ордені әлеуметтік жауапкершілігі мен қайырымдылығы жоғары кәсіпкерлерге беріледі. Кейбір жеңімпаздар оны келесі жылы ала алады.